ਬਚਪਨ ਤੋਂ ਸੁਣਦੀ ਆ ਰਹੀ ਸੀ, ਕਿ ਔਰਤ ਹੀ ਔਰਤ ਦੀ ਦੁਸ਼ਮਣ ਹੁੰਦੀ ਹੈ। ਪਹਿਲਾਂ ਇਹ ਗੱਲ ਸਮਝ ਨਹੀਂ ਸੀ ਪੈਂਦੀ ਕਿ ਇਹਦਾ ਮਤਲਬ ਕੀ ਹੈ। ਪਰ ਜਿਵੇਂ ਜਿਵੇਂ ਵੱਡੇ ਹੁੰਦੇ ਗਏ ਅਤੇ ਸਮਾਜ ਵਿੱਚ ਵਿਚਰਨ ਲੱਗੇ ਤਨ ਇਸ ਦੇ ਅਰਥ ਸਮਝ ਆਉਣੇ ਸ਼ੁਰੂ ਹੋ ਗਏ। ਹਾਲ ਹੀ ਵਿੱਚ ਇਕ ਘਟਨਾ ਸਾਹਮਣੇ ਆਈ, ਸਾਂਝੀ ਕਰਨ ਜਾ ਰਹੀ ਹਾਂ।
ਇਕ ਔਰਤ ਜੋ ਤਿੰਨ ਬੱਚਿਆਂ ਦੀ ਮਾਂ ਹੈ,ਉਸ ਨਾਲ ਵਾਹ ਪਏ ਨੂੰ ਤਿੰਨ ਕੁ ਸਾਲ ਹੋ ਗਏ ਹਨ। ਸੁਭਾਅ ਤੋਂ ਚੰਗੀ ਸੀ ਤੇ ਕੰਮ ਦੀ ਲੋੜ ਸੀ ਤਾਂ ਅਸੀਂ ਉਸਨੂੰ ਕੰਮ ਤੇ ਰਖ ਲਿਆ। ਉਹਦੀ ਜ਼ਿੰਦਗੀ ਦੀਆਂ ਔਕੜਾਂ ਦਾ ਗਿਆਨ ਹੋਣਾ ਸ਼ੁਰੂ ਓਦੋਂ ਹੋਇਆ ਜਦੋਂ ਇਕ ਦਿਨ ਆਪਣਾ ਮੂੰਹ ਸਿਰ ਲਪੇਟ ਕੇ ਕੰਮ ਤੇ ਆਈ, ਹਾਲਾਂਕਿ ਪਹਿਲਾਂ ਉਸਨੇ ਝੂਠ ਬੋਲਿਆ ਕੇ ਮੱਝ ਨੇ ਮਾਰਿਆ,ਪਰ ਜਦੋਂ ਮਗਰ ਉਸਦੀ ਸੱਸ ਬੁੜਬੁੜ ਕਰਦੀ ਆਈ ਤਾਂ ਗੱਲ ਸਾਡੀ ਸਮਝ ਆਈ ਕਿ ਅਸਲ ਵਿਚ ਇਹ ਘਰੇਲੂ ਹਿੰਸਾ ਦਾ ਸ਼ਿਕਾਰ ਹੋਈ ਹੈ। ਸੱਸ ਨੇ ਆਉਂਦਿਆਂ ਹੀ ਉਸ ਉੱਪਰ ਇਲਜਾਮਾਂ ਦੀ ਝੜੀ ਲਾ ਦਿੱਤੀ।ਇਹ ਸਾਨੂੰ ਡਰਾਉਂਦੀ ਹੈ, ਜਦੋਂ ਦੀ ਕੰਮ ਤੇ ਲਗੀ ਆ ਇਸ ਨੂੰ ਹਵਾ ਲਗ ਗਈ,ਹੁਣ ਮਰਜੀ ਕਰਦੀ ਆ। ਮੇਰੇ ਨਾਲ ਦੀ ਸਾਥੀ ਨੇ ਉਸਨੂੰ ਕਿਹਾ ਕਿ ਦੇਖੋ ਮਾਤਾ ਜੀ ਇੱਥੇ ਬੋਲਣਾ ਤੁਹਾਨੂੰ ਸੋਭਾ ਨਹੀਂ ਦਿੰਦਾ,ਘਰ ਦਾ ਮਸਲਾ ਘਰ ਹੱਲ ਕਰੋ। ਪਰ ਮੇਰਾ ਮਨ ਗੁੱਸੇ ਨਾਲ ਭਰ ਚੁੱਕਾ ਸੀ, ਜਦੋਂ ਮੈਂਨੂੰ ਪਤਾ ਲੱਗਾ ਕਿ ਉਸ ਨਾਲ ਕੁੱਟਮਾਰ ਕੀਤੀ ਗਈ ਹੈ। ਮੈਂ ਉਸ ਮਾਤਾ ਨੂੰ ਕਿਹਾ ਕਿ ਉਸਨੂੰ ਕੁੱਟਿਆ ਕਿਉ ਗਿਆ? ਤਾਂ ਉਸਨੇ ਜਵਾਬ ਦਿੱਤਾ , ਪੁੱਤ ਇਹ ਤਾਂ ਇਹਨਾ ਤੀਵੀਂ ਆਦਮੀ ਦਾ ਆਪਸੀ ਮਾਮਲਾ ਹੈ, ਸਾਨੂੰ ਕੀ ਪਤਾ। ਮੈਂ ਥੋੜਾ ਤਲਖ਼ੀ ਨਾਲ ਕਿਹਾ ਕਿ ਜੇ ਉਹਨਾਂ ਦਾ ਆਪਸੀ ਮਾਮਲਾ ਹੈ ਤਾਂ ਤੁਸੀਂ ਇੱਥੇ ਕੀ ਕਰਨ ਆਏ ਹੋ। ਚਲੋ ਕੁਝ ਗੱਲਬਾਤ ਤੋਂ ਬਾਦ ਉਸਨੂੰ ਵਾਪਸ ਭੇਜ ਦਿੱਤਾ। ਅਸੀਂ ਉਸਨੂੰ ਬੁਲਾਕੇ ਝਗੜੇ ਦਾ ਕਾਰਨ ਪੁੱਛਿਆ। ਉਸਦੀਆਂ ਅੱਖਾਂ ਵਿੱਚ ਹੰਜੂ ਆ ਗਏ,ਉਸਨੇ ਆਪਣਾ ਮੋਬਾਇਲ ਕੱਡ ਮੇਰੇ ਅੱਗੇ ਕਰ ਦਿੱਤਾ,ਜਿਸ ਵਿਚ ਘਰਵਾਲੇ ਦੀਆ ਕਿਸੇ ਹੋਰ ਜਨਾਨੀ ਨਾਲ ਅੱਧ- ਨੰਗੀਆਂ ਤਸਵੀਰਾਂ ਸਨ। ਉਸਨੇ ਕਿਹਾ ਕਿ ਉਹ ਘਰ ਇਕ ਪੈਸਾ ਨਹੀਂ ਦਿੰਦਾ, ਸਗੋ ਸੌਦਾ ਵੀ ਜੋ ਉਸਨੂੰ ਪੈਸੇ ਮਿਲਦੇ ਹਨ ਓਹਨਾ ਲੈ ਕੇ ਆਉਂਦਾ ਹੈ। ਜਦੋਂ ਇਹ ਫੋਟੋ ਉਸਨੇ ਆਪਣੀ ਸੱਸ ਨੂੰ ਦਿਖਾਈ ਤਾਂ ਉਲਟਾ ਉਸਨੇ ਆਪਣੇ ਪੁੱਤ ਨੂੰ ਕਹਿ ਕੇ ਮੈਂਨੂੰ ਹੀ ਕੁਟਵਾ ਦਿੱਤਾ।
...

ਅਸੀ ਕਿਹਾ ਕਿ ਹੁਣ ਸੱਸ ਇੱਥੇ ਕੀ ਕਰਨ ਆਈ ਸੀ, ਉਸਨੇ ਕਿਹਾ ਕਿ ਇਹ ਚਾਹੁੰਦੀ ਹੈ ਕਿ ਮੈਂ ਇੱਥੋਂ ਕੰਮ ਛੱਡ ਦੇਵਾਂ,ਤੇ ਇਕ ਵਾਰ ਫਿਰ ਉਹਨਾਂ ਅੱਗੇ ਹੱਥ ਅਡਾਂ।ਸੱਸ ਨੂੰ ਆਪਣੇ ਪਤੀ ਦੀ ਪੈਨਸ਼ਨ ਮਿਲਦੀ ਸੀ, ਜਿਸਦਾ ਹੰਕਾਰ ਅਸੀਂ ਸਾਫ ਉਸਦੇ ਬੋਲਾਂ ਵਿਚ ਭਰਿਆ ਸੁਣਿਆ ਸੀ। ਚੱਲੋ ਬਿਪਤਾ ਮਾਰੀ ਤਿੰਨ ਬੱਚਿਆਂ ਦੇ ਫ਼ਿਕਰ ਵਿਚ ਓਹ ਫਿਰ ਸਬਰ ਦਾ ਘੁੱਟ ਭਰ ਰਹਿ ਗਈ।ਪਰ ਪਤੀ ਦੀ ਅਯੱਸੀ ਓਵੇਂ ਹੀ ਚਲਦੀ ਰਹੀ। ਪਰ ਮੈਂ ਕਦੇ ਉਸਦੇ ਚਿਹਰੇ ਤੇ ਉਦਾਸੀ ਨਾਂ ਦੇਖੀ। ਜਦੋਂ ਪੁੱਛਣਾ ਕਿ ਤੈਨੂੰ ਗੁੱਸਾ ਨਹੀਂ ਆਉਂਦਾ,ਤਾਂ ਉਸਨੇ ਹੱਸ ਕੇ ਕਹਿਣਾ ਜੀਂ ਫਿਰ ਹੁਣ ਕਰਾਂ ਵੀ ਕੀ? ਦੋ ਜਵਾਨ ਧੀਆ ਲੇ ਕੇ ਕਿੱਥੇ ਜਾਵਾਂ। ਮੈਂਨੂੰ ਉਸਦੀ ਬੇਬਸੀ ਤੇ ਤਰਸ ਆਉਂਦਾ। ਤੇ ਨਾਲ਼ ਹੀ ਉਸਦੀ ਸੱਸ ਤੇ ਗੁੱਸਾ , ਜੋ ਆਪਣੇ ਪੁੱਤ ਦੀਆ ਕਰਤੂਤਾਂ ਜਾਣਦੇ ਹੋਏ ਵੀ ਆਪਣੀ ਨੂੰਹ ਨੂੰ ਦੋਸ਼ੀ ਠਹਿਰਾਉਣ ਵਿਚ ਕੋਈ ਕਸਰ ਨਾ ਛਡਦੀ। ਬਲਕਿ ਉਸ ਨੂੰ ਹੀ ਗ਼ਲਤ ਸਬਿਤ ਕਰਨ ਤੇ ਤੁਲੀ ਹੋਈ ਸੀ। ਜਦੋ ਹੋਰ ਕੋਈ ਵਾਹ ਨਾ ਲੱਗਦੀ ਦਿਸੀ ਤਾਂ ਉਸਦੇ ਚਰਿੱਤਰ ਤੇ ਉੰਗਲੀ ਚੁੱਕ ਦਿੱਤੀ, ਕਿ ਮੈਂ ਇਸਦਾ ਚੋਰੀ ਰੱਖਿਆ ਸਿਮ ਕਾਰਡ ਫੜਿਆ। ਮੈਂ ਉਸਦੀ ਸੱਸ ਨੂੰ ਕਿਹਾ ਕਿ ਸਿਮ ਕਾਰਡ ਹੋਣ ਨਾਲ਼ ਇਹ ਗ਼ਲਤ ਕਿਵੇਂ ਸਾਬਿਤ ਹੁੰਦੀ ਹੈ,ਅੱਜ ਦੇ ਸਮੇਂ ਵਿੱਚ 10 ਸਾਲ ਦੇ ਬੱਚਿਆ ਤਕ ਕੋਲ ਫੋਨ ਹਨ। ਤਾਂ ਉਸਨੇ ਕਿਹਾ ਐਵੇ ਕਿਵੇਂ ਜੇ ਇਸਨੇ ਫੋਨ ਕਰਨਾ ਤਾਂ ਆਪਣੇ ਆਦਮੀ ਦੇ ਫੋਨ ਤੋਂ ਗੱਲ ਕਰੇ ਜਾਂ ਮੇਰਾ ਫੋਨ ਲੈ ਕੇ ਕਰੇ,ਇਸਨੂੰ ਫੋਨ ਦੀ ਕੀ ਲੋੜ ਹੈ। ਮੈ ਕਿਹਾ ਕਿ ਤੁਸੀ ਫੋਨ ਕਿਉ ਰੱਖਿਆ? ਤਾਂ ਉਸਨੇ ਕਿਹਾ ਕਿ ਮੇਰੇ ਰਿਸ਼ਤੇਦਾਰ, ਮੇਰੀਆ ਧੀਆ ਨਾਲ ਗੱਲ ਕਰਨ ਲਈ। ਮੈਂ ਫਿਰ ਸਵਾਲ ਕੀਤਾ ਕਿ ਕਿਉੰ ਉਸਦੇ ਰਿਸ਼ਤੇਦਾਰ ਤੇ ਉਸਦੇ ਮਾਤਾ ਪਿਤਾ ਨਹੀਂ ਹਨ। ਉਸਨੇ ਵੀ ਗੱਲ ਕਰਨੀ ਹੁੰਦੀ ਹੈ। ਮੇਰੀ ਤਲਖ਼ੀ ਦੇਖ ਓਹ ਥੋੜ੍ਹਾ ਚੁੱਪ ਕਰ ਗਈ ਅਤੇ ਅਵਾ ਤਵਾ ਬੋਲਦੀ ਓਥੋਂ ਚਲੀ ਗਈ ਅਤੇ ਮੈਂ ਕਿੰਨੀ ਦੇਰ ਉਸਦੀ ਸੋਚ ਅਤੇ ਮਾਨਸਿਕਤਾ ਬਾਰੇ ਸੋਚ ਕਿ ਝੁਰਦੀ ਰਹੀ ਕੇ ਕਦੋਂ ਇਕ ਔਰਤ ਦੂਜੀ ਔਰਤ ਦਾ ਸਨਮਾਨ ਕਰੇਗੀ? ਜੇ ਆਪਣੇ ਧੀ- ਪੁੱਤ ਦੀ ਗੱਲ ਹੈ ਤਾਂ ਪਰਦਾ,ਪਰ ਬੇਗਾਨੀ ਧੀ ਦਾ ਦਰਦ ਡਰਾਮਾ।
ਵਰਿੰਦਰ ਬੁੱਗਾ।