ਮੂਵਿੰਗ ਕੰਪਨੀ ਵਿਚ ਨਵੀਂ-ਨਵੀਂ ਨੌਕਰੀ ਮਿਲੀ..
ਟਰੇਨਿੰਗ ਦੌਰਾਨ ਦੋ ਗੱਲਾਂ ਤੇ ਜ਼ੋਰ ਦਿੱਤਾ ਗਿਆ..ਸਮਾਨ ਟਾਈਮ ਸਿਰ ਅੱਪੜਨਾ ਚਾਹੀਦਾ ਏ..ਤੇ ਉਹ ਵੀ ਬਿਨਾ ਕਿਸੇ ਟੁੱਟ ਭੱਜ ਦੇ!
ਉਸ ਦਿਨ ਮਿਲਿਟਰੀ ਦੇ ਅਫਸਰ ਦੇ ਸਮਾਨ ਦੀ ਡਿਲੀਵਰੀ ਸੀ..
ਹੈ ਤਾਂ ਆਪਣੇ ਸਰਦਾਰ ਜੀ ਸਨ ਪਰ ਦੇਖਣ ਨੂੰ ਬੜੇ ਹੀ ਗੁੱਸੇ ਵਾਲੇ..ਪੈਰ ਪੈਰ ਤੇ ਫੌਜੀਆਂ ਵਾਲੇ ਹੁਕਮ ਚਾੜ ਰਹੇ ਸਨ!
ਟੈਨਸ਼ਨ ਵਿਚ ਪਤਾ ਨੀ ਲੱਗਾ ਕਦੋਂ ਟੀਵੀ ਵਾਲੀ ਪੈਕਿੰਗ ਹੱਥੋਂ ਛੁੱਟ ਭੁੰਝੇ ਡਿੱਗ ਪਈ..ਹੱਥ ਪੈਰ ਸੁੰਨ ਹੋ ਗਏ..ਫੇਰ ਵੀ ਕਾਬੂ ਰੱਖਦਿਆਂ ਇਹ ਸੋਚ ਬਕਸਾ ਓਸੇ ਤਰਾਂ ਹੀ ਚਾੜ ਦਿੱਤਾ ਕੇ ਸਾਰਾ ਸਮਾਨ ਲਾਹ ਕੇ ਆਪ ਹੀ ਦੱਸ ਦਵਾਂਗਾ!
ਹਿਸਾਬ ਜਿਹਾ ਲਾ ਲਿਆ ਕੇ ਅਗਲੇ ਦੋ ਮਹੀਨੇ ਦੀ ਤਨਖਾਹ ਤਾਂ ਇਸੇ ਨੁਕਸਾਨ ਦੇ ਹਰਜਾਨੇ ਵਿਚ ਗਈ ਸਮਝੋ ਗਈ..
ਸਾਰੇ ਰਾਹ ਸੋਚਦਾ ਆਇਆ ਕੇ ਹੁਣ ਉਧਾਰ ਕਿਧਰੋਂ ਲੈਣੇ ਨੇ..ਖੈਰ ਮੰਜਿਲ ਤੇ ਅੱਪੜ ਸਾਰਾ ਸਮਾਨ ਲਾਹੁਣਾ ਸ਼ੁਰੂ ਕਰ ਦਿੱਤਾ!
ਸਬੱਬ ਦੇਖੋ..ਜਾਂਦਿਆਂ ਹੀ ਨਿਆਣਿਆਂ ਦੁਹਾਈ ਚੁੱਕ ਦਿੱਤੀ..ਸਭ ਤੋਂ ਪਹਿਲਾਂ ਸਾਡਾ ਟੀਵੀ ਲਗਵਾ ਦਿਓ”
ਪੈਕ ਖੋਲਿਆ ਤਾਂ ਸਕਰੀਨ ਤੇ ਤਰੇੜਾਂ ਹੀ ਤਰੇੜਾਂ..ਚਾਰੇ ਪਾਸੇ ਚੁੱਪ ਛਾ ਗਈ..
ਡਰਾਈਵਰ ਜਿਹੜਾ ਹੈਲਪਰ ਦਾ ਕੰਮ ਵੀ ਕਰਿਆ ਕਰਦਾ ਸੀ..ਆਖਣ ਲੱਗਾ “ਬਲਬੀਰ ਸਿਆਂ ਟੀ ਵੀ ਤੇ ਤੂੰ ਹੀ ਚਾੜਿਆ ਸੀ ਨਾ..?”
ਮੇਰੇ ਹਾਂ ਆਖਣ ਨਾਲ ਹੀ ਮੇਰੇ ਤੇ ਕਸੂਰਵਾਰ ਹੋਣ ਦੀ ਮੋਹਰ ਵੀ ਲੱਗ ਗਈ..ਬਸ ਸਜਾ ਦਾ ਹੀ ਇੰਤਜਾਰ ਸੀ..!
ਸਰਦਾਰ ਹੂਰੀ ਗੁੱਸੇ ਨਾਲ ਦੇਖਦੇ ਰਹੇ ਫੇਰ ਪਤਨੀ ਤੇ ਬੱਚੇ ਕਮਰੇ...
ਚੋਂ ਬਾਹਰ ਕੱਢ ਅੰਦਰੋਂ ਕੁੰਡਾ ਲਾ ਲਿਆ
ਸੋਚ ਲਿਆ ਕੇ ਹੁਣ ਪੱਕਾ ਮਿਲਿਟਰੀ ਸਟਾਈਲ ਵਿਚ ਗਾਹਲਾਂ ਪੈਣਗੀਆਂ..ਮੈਨੇਜਰ ਨੂੰ ਫੋਨ ਵੀ ਜਾਊ ਤੇ ਨੌਕਰੀ ਦਾ ਵੀ ਕੋਈ ਪਤਾ ਨਹੀ ਰਹੂ ਕੇ ਨਾ ਰਹੂ!
ਕੁਝ ਚਿਰ ਦੀ ਚੁੱਪੀ ਮਗਰੋਂ ਆਖਣ ਲੱਗੇ ਮੈਨੂੰ ਨਹੀਂ ਪਤਾ ਤੁਹਾਨੂੰ ਟਰੇਨਿੰਗ ਵਿਚ ਕੀ ਕੀ ਸਿਖਾਇਆ ਜਾਂਦਾ ਪਰ ਸਾਡੀ ਫੌਜੀ ਟਰੇਨਿੰਗ ਦੱਸਦੀ ਏ ਕੇ ਜੰਗ ਵਿਚ ਅੱਗੇ ਵੀ ਵਧਣਾ ਤੇ ਆਪਣਾ ਬਚਾ ਵੀ ਕਰਨਾ..
ਅੱਗੋਂ ਆਪਣਾ ਕੰਮ ਧਿਆਨ ਨਾਲ ਕਰੀਂ..ਜਾ ਦੌੜ ਜਾ..!
ਸੰਖੇਪ ਜਿਹੇ ਵਾਰਤਾਲਾਪ ਮਗਰੋਂ ਏਡੀ ਛੇਤੀ ਖਲਾਸੀ ਹੋ ਜੂ..ਸੁਫ਼ਨੇ ਵਿਚ ਵੀ ਨਹੀਂ ਸੀ ਸੋਚਿਆ..ਮੇਰੇ ਹੱਥ ਜੁੜੇ ਦੇ ਜੁੜੇ ਹੀ ਰਹਿ ਗਏ..ਫੇਰ ਵੀ ਜਾਂਦਿਆਂ ਜਾਂਦਿਆਂ ਪੁੱਛ ਹੀ ਲਿਆ ਕੇ ਸਾਬ ਜੀ ਉਹ ਟੁੱਟਾ ਹੋਇਆ ਟੇਲੀਵਿਜਨ?
ਆਖਣ ਲੱਗੇ ਪੁੱਤਰਾ ਉਹ ਤੇ ਹੋਰ ਵੀ ਆ ਜਾਊ..ਪਰ ਤੈਨੂੰ ਕਿਸੇ ਦੂਜੀ ਨੌਕਰੀ ਤੇ ਸੌਖਿਆਂ ਨੀ ਰੱਖਣਾ!
ਸੋ ਦੋਸਤੋ ਜਜਬਾਤਾਂ ਦੀ ਮੰਡੀ ਵਿਚ ਕੁਝ ਇਨਸਾਨ ਐਸੇ ਵੀ ਹੁੰਦੇ ਜਿਹੜੇ ਨਿਲਾਮ ਹੋ ਰਹੀਆਂ ਕਦਰਾਂ ਕੀਮਤਾਂ ਦੀ ਵੱਡੀ ਤੋਂ ਵੱਡੀ ਬੋਲੀ ਲਾਉਣ ਲੱਗਿਆ ਮਿੰਟ ਵੀ ਨੀ ਲਾਉਂਦੇ..ਕਿਓੰਕੇ ਉਹ ਜਾਣਦੇ ਨੇ ਕੇ ਜੇ ਇਹ ਕੀਮਤੀ ਚੀਜਾਂ ਕਿਸੇ ਨਾਸ਼ੁਕਰੇ ਹੱਥ ਵਿਚ ਚਲੀਆਂ ਗਈਆਂ ਤਾਂ ਬੁਰੀ ਤਰਾਂ ਰੋਲ ਦਿੱਤੀਆਂ ਜਾਣਗੀਆਂ!
ਹਰਪ੍ਰੀਤ ਸਿੰਘ ਜਵੰਦਾ
