ਮੈਂ ਦੁਬਈ ਏਅਰਪੋਰਟ ਤੇ ਗ੍ਰਾਹਕ ਸੇਵਕ ਵਜੋਂ ਕੰਮ ਕਰਦਾ ਹਾਂ। ਰੋਜਾਨਾ ਹੀ ਅਲੱਗ ਅਲੱਗ ਦੇਸਾਂ ਦੇ ਲੋਕਾਂ ਨਾਲ ਵਿਚਰਨ ਦਾ ਮੌਕਾ ਮਿਲਦਾ ਹੈ । ਆਪਣੇ ਕੰਮ ਦੇ ਨਾਲ ਨਾਲ ਬਹੁਤ ਕੁਝ ਨਵਾਂ ਜਾਣਨ ਨੂੰ ਤੇ ਸਿੱਖਣ ਨੂੰ ਮਿਲਦਾ ਹੈ ।
ਕੁਝ ਦਿਨ ਪਹਿਲਾਂ ਦੀ ਗੱਲ ਆ । ਇੱਕ ਰੋਮਾਨੀਅਨ ਤੀਹ ਕੁ ਸਾਲ ਦੀ ਔਰਤ ਦੋ ਬੱਚਿਆਂ ਦੇ ਨਾਲ ਮਾਲਦੀਵ ਦੀ ਯਾਤਰਾ ਤੋਂ ਆਈ । ਹੁਣ ਓਹਨਾ ਨੇ ਬੁਕਾਰੇਸਟ ਜਾਣ ਵਾਲੀ ਫਲ਼ਾਈਟ ਲੈਣੀ ਸੀ । ਜੋ ਟਰਮੀਨਲ 3 ਤੋਂ ਸੀ । ਦੂਸਰੇ ਟਰਮੀਨਲ਼ ਤੇ ਜਾਣ ਲਈ ਓਹ ਸ਼ਟਲ ਬੱਸ ਦੀ ਉਡੀਕ ਕਰ ਰਹੇ ਸੀ । ਸ਼ਟਲ ਬੱਸ ਅਕਸਰ ਪੰਦਰਾਂ ਮਿੰਟ ਦੇ ਫ਼ਰਕ ਨਾਲ ਆਉਂਦੀ ਹੈ । ਦੋਵੇਂ ਬੱਚੇ ਕਿਲਕਾਰੀਆਂ ਮਾਰਦੇ ਆਪਸ ਚ ਖੇਡਦੇ ਫਿਰ ਰਹੇ ਸਨ । ਉਹ ਅੌਰਤ ਕੋਈ ਕਿਤਾਬ ਪੜਨ ਚ ਮਸਰੂਫ ਸੀ। ਬੱਚਿਆਂ ਚੋਂ ਲੜਕੀ ਲਗਭਗ 7 – 8 ਸਾਲ ਤੇ ਲੜਕਾ 4 ਕੁ ਸਾਲ ਦਾ ਹੋਵੇਗਾ । ਕੁਝ ਦੇਰ ਖੇਡਣ ਦੇ ਬਾਅਦ ਓਹ ਆਪਣੀ ਮਾਂ ਕੋਲ ਆਏ । ਮਾਂ ਨੇ ਉਹਨਾ ਨੂੰ ਖਾਣ ਲਈ ਬਿਸਕਿਟ ਵਗੈਰਾ ਦਿੱਤੇ । ਛੋਟੀ ਲੜਕੀ ਨੇ ਉਹ ਖਾਣ ਤੋਂ ਬਾਅਦ ਖਾਲੀ ਉਪਰਲਾ ਕਵਰ ਨੇੜੇ ਪਏ ਡਸਟਬਿਨ ਚ ਪਾ ਦਿਤਾ । ਹੁਣ ਛੋਟੇ ਲੜਕੇ ਦੀ ਵਾਰੀ ਸੀ ਪਰ ਕਦ ਚ ਛੋਟਾ ਹੋਣ ਕਾਰਨ ਓਸਦਾ ਹੱਥ ਡਸਟਬਿਨ ਦੇ ਮੂੰਹ ਤੀਕਰ ਨਹੀ ਪਹੁੰਚ ਰਿਹਾ ਸੀ । ਉਹ ਬਾਰ ਬਾਰ ਕੋਸ਼ਿਸ ਕਰਦਾ ਪਰ ਅਸਫਲ ਰਹਿ ਜਾਦਾਂ । ਨੇੜੇ ਬੈਠੀ ਮਾਂ ਸਭ ਦੇਖ ਰਹੀ ਸੀ । ਓਹ...

ਵਾਰ ਵਾਰ ਆਪਣੇ ਪੁੱਤਰ ਦੀ ਹੌਸਲਾ ਅਫਜਾਈ ਕਰ ਰਹੀ ਸੀ । ਆਪਣੇ ਭਰਾ ਦੀ ਅਸਫਲਤਾ ਦੇਖ ਕੇ ਇੱਕ ਵਾਰ ਓਸਦੀ ਭੈਣ ਨੇ ਕਾਗਜ ਡਸਟਬਿਨ ਚ ਸੁੱਟਣ ਦੀ ਕੋਸ਼ਿਸ਼ ਕੀਤੀ । ਪਰ ਮਾਂ ਨੇ ਉਸ ਨੂੰ ਅਜਿਹਾ ਕਰਨ ਤੋਂ ਰੋਕਿਆ । ਫੇਰ ਓਹ ਦੋਵੇਂ ਛੋਟੇ ਬੱਚੇ ਦੀ ਹੌਸਲਾ ਅਫ਼ਜ਼ਾਈ ਕਰਨ ਲੱਗੀਆਂ । ਆਖਿਰ ਕੁਝ ਅਸਫਲ ਕੋਸ਼ਿਸ਼ਾਂ ਦੇ ਬਾਅਦ ਬੱਚਾ ਕਾਗਜ ਡਸਟਬਿਨ ਚ ਪਾਓਣ ਚ ਕਾਮਯਾਬ ਹੋ ਗਿਆ । ਮਾਂ ਤੇ ਭੈਣ ਨੇ ਖੜੇ ਹੋ ਕੇ ਉਸ ਬੱਚੇ ਲਈ ਤਾੜੀਆਂ ਮਾਰੀਆਂ । ਛੋਟਾ ਬੱਚਾ ਆਪਣੀ ਸਫਲਤਾ ਤੇ ਖੁਸ਼ ਸੀ ।
ਕਦੇ ਕਦੇ ਸਾਡੇ ਬੱਚੇ ਵੀ ਅਜਿਹਾ ਕੁਝ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ । ਪਰ ਅਸੀਂ ਹੌਸਲਾ ਵਧਾਓਣ ਦੀ ਜਗਾ ਓਹ ਕੰਮ ਜਲਦੀ ਨਾਲ ਆਪ ਕਰ ਦਿੰਦੇ ਹਾਂ । ਜਾਂ ਉਸਨੂੰ ਉਤਸ਼ਾਹਿਤ ਹੀ ਨਹੀ ਕਰਦੇ । ਇਸ ਨਾਲ ਬੱਚੇ ਚ ਹੀਣਤਾ ਦੀ ਭਾਵਨਾ ਪੈਦਾ ਹੁੰਦੀ ਆ। ਸਗੋਂ ਹੌਲੀ ਹੌਲੀ ਬੱਚਾ ਢੀਠਪੁਣੇ ਦਾ ਵੀ ਸ਼ਿਕਾਰ ਹੋ ਜਾਦਾਂ ਹੈ । ਪੱਛਮੀ ਲੋਕਾਂ ਦੀ ਸ਼ਾਇਦ ਕਾਮਯਾਬੀ ਦਾ ਇਹੀ ਰਾਜ ਹੈ । ਸਿਆਣਿਆਂ ਨੇ ਠੀਕ ਹੀ ਕਿਹਾ ਏ …ਬੱਚੇ ਕੱਚੀ ਮਿੱਟੀ ਦੀ ਨਿਆਈੰ ਹੁੰਦੇ ਨੇ ਜੋ ਆਕਾਰ ਦਿਓਗੇ ਉਦਾਂ ਦੇ ਹੀ ਹੋ ਜਾਣਗੇ
ਅਮਨਦੀਪ ਸਿੰਘ
ਜੂਨ 19 2021