ਰਿਸ਼ਤੇਦਾਰੀ ਵਿਚ ਜਵਾਈ ਭਾਈ ਲਗਦਾ ਸਾਡਾ ਇੱਕ ਰਿਸ਼ਤੇਦਾਰ ਕਪੜੇ ਦਾ ਕੰਮ ਕਰਦਾ ਸੀ। ਚਾਹੇ ਰਿਸ਼ਤੇਦਾਰੀ ਦੂਰ ਦੀ ਹੀ ਸੀ ਪਰ ਸਾਡਾ ਵਾਹਵਾ ਆਉਣ ਜਾਣ ਸੀ ਉਸਨਾਲ । ਮੇਰੇ ਪਾਪਾ ਜੀ ਦੀ ਓਹ ਬਹੁਤ ਇੱਜਤ ਕਰਦਾ ਸੀ ਓਹ। ਇੱਕ ਵਾਰੀ ਉਸਦੇ ਸੋਹਰੇ ਪਰਿਵਾਰ ਵਿਚ ਕੋਈ ਵਿਆਹ ਸੀ ਤੇ ਉਸਨੇ ਪਾਪਾ ਜੀ ਨਾਲ ਵਾਇਦਾ ਕਰ ਲਿਆ ਕਿ ਓਹ ਵਿਆਹ ਜਰੂਰ ਜਾਵੇਗਾ ਤੇ ਵਿਆਹ ਵਿਚ ਬੀਬਾ ਬਣਕੇ ਰਹੇਗਾ। ਕੋਈ ਜਵਾਈਆਂ ਵਾਲੀ ਕਰਤੂਤ ਨਹੀ ਕਰੇਗਾ। ਕਿਉਂਕਿ ਸ਼ਰਾਬ ਪੀਕੇ ਓਹ ਅਕਸਰ ਹੀ ਕੋਈ ਹੁਲੜਬਾਜ਼ੀ ਕਰ ਦਿੰਦਾ ਸੀ ਤੇ ਇਕ ਦੋ ਵਾਰੀ ਸੇਵਾ ਵੀ ਕਰਵਾ ਚੁਕਿਆ ਸੀ। ਮਿਥੇ ਦਿਨ ਤੇ ਤਹਿਸ਼ੁਦਾ ਪ੍ਰੋਗਰਾਮ ਅਨੁਸਾਰ ਅਸੀਂ ਪਿੰਡੋਂ ਵਿਆਹ ਲਈ ਤਿਆਰ ਹੋਕੇ ਉਸਨੁ ਲੈਣ ਉਸਦੀ ਦੁਕਾਨ ਤੇ ਆ ਗਏ। ਪਰ ਓਹ ਤਾਂ ਬਦਲਿਆ ਬੈਠਾ ਸੀ ਤੇ ਜਵਾਈਪੁਣੇ ਵਾਲਾ ਕੀੜਾ ਉਸਦੇ ਦਿਮਾਗ ਵਿਚ ਵੜ੍ਹ ਚੁਕਿਆ ਸੀ। ਤੇ ਓਹ ਆਨਾਕਾਰੀ ਕਰਨ ਲੱਗਾ। ਮੇਰੇ ਪਾਪਾ ਜੀ ਨੇ ਉਸਨੂੰ ਸਮਝਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ। ਉਸਦੀਆਂ ਖੂਬ ਮਿਨਤਾਂ ਵੀ ਕੀਤੀਆਂ। ਪਰ ਓਹ ਟਸ ਤੋਂ ਮਸ ਨਾ ਹੋਇਆ। ਕਿਉਂਕਿ ਉਸਨੂੰ ਵਿਆਹ ਤੇ ਲਿਜਾਣਾ ਪਾਪਾ ਜੀ ਦੀ ਇਜ਼ਤ ਦਾ ਸਵਾਲ ਸੀ। ਪਰ ਓਹ ਆਪਣੀ ਕੋਨਾ ਮਾਨੂੰ ਵਾਲੀ ਗੱਲ ਤੇ ਅੜਿਆ ਹੋਇਆ ਸੀ। ਦੁਕਾਨ ਦੇ ਮੂਹਰੇ ਬੈਠਾ ਦਰਜ਼ੀ ਸਾਰੀ ਗੱਲਬਾਤ ਸੁਣ ਰਿਹਾ ਸੀ। ਓਹ ਦਰਜ਼ੀ ਥੋੜਾ ਸ਼ਰਾਰਤੀ ਦਿਮਾਗ ਸੀ। ਹੋਲੀ ਹੋਲੀ ਓਹ ਕੋਈ ਗਾਣਾ ਗੁਣ ਗਣਾਉਣ ਲਗਿਆ। ਗਾਣੇ ਦੇ ਬੋਲ ਸਨ। ‘ਅੜੀ ਓ ਅੜੀ ਨਾ ਕਰ ਬਹੁਤੀ...
ਤੂ ਅੜੀ , ਦੁਧ ਪੀ ਲੈ ਬਾਲਮਾਂ ਮੈ ਕਦੋਂ ਦੀ ਖੜੀ . ਅੜੀ ਓ ਅੜੀ ਨਾ ਕਰ ਬਹੁਤੀ ਤੂ ਅੜੀ. …………..।” ਬਸ ਫਿਰ ਕੀ ਸੀ ਪਾਪਾ ਜੀ ਨੂੰ ਲਗਿਆ ਕਿ ਇਹ ਦਰਜੀ ਮੈਨੂੰ ਚਿੜਾ ਰਿਹਾ ਹੈ। ਤੇ ਪਾਪਾ ਜੀ ਨੂੰ ਗੁੱਸਾ ਆ ਗਿਆ। ਖੜੇ ਹੋਕੇ ਕਹਿੰਦੇ, ‘ਇਹ ਤਾਂ ਸਾਡਾ ਜਵਾਈ ਭਾਈ ਹੈ। ਇਸ ਨਾਲ ਤਾਂ ਮੈਂ ਫਿਰ ਨਿਬੜੂ। ਪਹਿਲਾਂ ਤੈਨੂੰ ਮੈ ਪਿਆਉਂਦਾ ਹਾਂ ਦੁੱਧ।” ਤੇ ਓਹਨਾ ਨੇ ਦਰਜ਼ੀ ਦੇ ਤਿੰਨ ਚਾਰ ਜੜ ਦਿੱਤੀਆਂ। ਦਰਜ਼ੀ ਨੂੰ ਗਾਣੇ ਦੇ ਬੋਲ ਭੁਲ ਗਏ ਤੇ ਕੰਨ ਟੇ ਟੇ ਕਰਨ ਲਗ ਪਿਆ। ਇਹ ਵੇਖਕੇ ਜਵਾਈ ਭਾਈ ਵੀ ਕੰਬ ਗਿਆ ਤੇ ਪਾਪਾ ਜੀ ਨੂੰ ਮਾਸੜ ਜੀ ਮਾਸੜ ਜੀ ਕਰਨ ਲਗ ਪਿਆ ਤੇ ਵਿਆਹ ਤੇ ਜਾਣ ਨੂੰ ਤਿਆਰ ਹੋ ਗਿਆ। ਵਿਆਹ ਵਿਚ ਵੀ ਓਹ ਜਵਾਈ ਭਾਈ ਬੀਬਾ ਬਣ ਕੇ ਰਿਹਾ ਤੇ ਭੋਰਾ ਵੀ ਨਹੀ ਕੁਸਕਿਆ। ਵਿਆਹ ਤੋਂ ਵਾਪਸੀ ਤੇ ਉਸ ਜਵਾਈ ਭਾਈ ਨੇ ਉਸ ਦਰਜ਼ੀ ਦੀ ਵੀ ਛੁਟੀ ਕਰ ਦਿੱਤੀ । ਬਿਚਾਰਾ ਦਰਜ਼ੀ ਬਿਨਾ ਕਸੂਰ ਦੇ ਹੀ ਚੋਪੜਿਆ ਗਿਆ। ਹੁਣ ਜਦੋ ਵੀ ਮੈ ਇਹ ਗਾਣਾ ਸੁਣਦਾ ਹਾਂ ਤਾਂ ਮੈਨੂ ਉਸ ਦਰਜ਼ੀ ਦੀ ਤੇ ਉਸ ਜਵਾਈਗਿਰੀ ਵਾਲੇ ਜਵਾਈ ਦੀ ਯਾਦ ਆ ਜਾਂਦੀ ਹੈ।
ਰਮੇਸ਼ਸੇਠੀਬਾਦਲ
ਸਾਬਕਾ ਸੁਪਰਡੈਂਟ।