ਕਿਤਾਬ

ਅਮਰੀਕੀ ਪਰਿਵਾਰ..ਇੱਕ ਬੱਚੇ ਨੇ ਜਨਮ ਲਿਆ..ਵੱਡਾ ਹੋਇਆ..ਹੱਡ-ਭੰਨਵੀਂ ਮੇਹਨਤ ਕੀਤੀ..ਪਾਰਟ ਟਾਈਮ ਜੋਬਾਂ ਕੀਤੀਆਂ!
ਟਾਪ ਕਲਾਸ ਮੈਡੀਕਲ ਸਕੂਲ ਵਿਚ ਦਾਖਲਾ ਲਿਆ..ਫਿਰ ਵਜੀਫਾ..ਫੇਰ ਪੰਜ ਛੇ ਸਾਲ ਦੀ ਹੋਰ ਸਖਤ ਮੇਹਨਤ ਤੋਂ ਬਾਅਦ ਡਿਗਰੀ ਹਾਸਿਲ ਕੀਤੀ!
ਫੇਰ ਇੱਕ ਬਹੁਤ ਹੀ ਵੱਡੇ ਹਸਪਤਾਲ ਵਿਚ ਇਕ ਸਾਲ ਵੋਲੰਟੀਅਰ ਕੰਮ ਕੀਤਾ!
ਰਿਸਰਚ ਕਰਨ ਹੋਰ ਵੱਡੀ ਯੂਨੀਵਰਸਿਟੀ ਵਿਚ ਦਾਖਿਲਾ ਲੈ ਲਿਆ.!
ਓਥੇ ਵੀ ਤਿੰਨ ਸਾਲ ਹੱਡ-ਭੰਨਵੀਂ ਮੇਹਨਤ ਕੀਤੀ ਤੇ ਹੋਰ ਬਥੇਰੇ ਪਾਪੜ ਵੇਲੇ..!
ਫੇਰ ਪੀ.ਐਚ.ਡੀ ਦੀ ਡਿਗਰੀ ਤੇ ਸਪੇਸ਼ੀਏਲਿਟੀ ਵਾਸਤੇ ਦੋ ਸਾਲ ਹੋਰ ਪੜਨਾ ਪਿਆ
ਅੱਧੀ ਉਮਰ ਲੰਘ ਗਈ ਵੱਲ ਚਿੱਟੇ ਹੋ ਗਏ..ਪਰ ਬਹਾਦਰ ਇਨਸਾਨ ਨੇ ਹੋਂਸਲਾ ਨਾ ਛੱਡਿਆ!
ਆਖਿਰ ਮੇਹਨਤ ਰੰਗ ਲਿਆਈ..ਡਾਕਟਰ ਬਣ ਗਿਆ..ਬਚਪਨ ਤੋਂ ਹੀ ਇੱਕ ਸੁਪਨਾ ਪਾਲ ਰਖਿਆ ਸੀ ਕੇ ਜਿਸ ਦਿਨ ਪੂਰਾ ਡਾਕਟਰ ਬਣਿਆ..ਇੰਡੀਆ ਜਾ ਕੇ “ਤਾਜ-ਮਹੱਲ” ਜਰੂਰ ਦੇਖਣਾ!
ਘੁੰਮਦਿਆਂ ਕੋਈ ਬੋਲਣ ਦੀ ਦਿੱਕਤ ਨਾ ਆਵੇ..ਕਲਾਸਾਂ ਲਾ ਕੇ ਹਿੰਦੀ ਪੜਣੀਂ...

ਤੇ ਲਿਖਣੀਂ ਸਿੱਖੀ !
ਪਹਿਲੀ ਤਨਖਾਹ ਮਿਲਦਿਆਂ ਫਲਾਈਟ ਫੜ ਦਿੱਲੀ ਹਵਾਈ ਅੱਡੇ ਤੇ ਉੱਤਰ ਟੈਕਸੀ ਕਰ ਸਿੱਧਾ ਆਗਰੇ ਪੁੱਜ ਗਿਆ !
ਉਤਰਦਿਆਂ ਹੀ ਅਚਾਨਕ ਸੜਕ ਕੰਡੇ ਲੱਗੀ ਕਿਤਾਬਾਂ ਤੇ ਰਸਾਲਿਆਂ ਦੀ ਰੇਹੜੀ ਤੇ ਨਜਰ ਪੈ ਗਈ!
ਬੇਧਿਆਨੀ ਵਿਚ ਹੀ ਪਤਲੀ ਜਿਹੀ ਕਿਤਾਬ ਚੁੱਕ ਲਈ..ਕੁਝ ਪੜਿਆ..ਦੂਜੀ ਵਾਰੀ ਫੇਰ ਧਿਆਨ ਨਾਲ ਪੜਿਆ..ਤੇ ਨਾਲ ਹੀ ਦਿਲ ਦਾ ਦੌਰਾ ਪੈ ਗਿਆ ਤੇ ਤਾਜ ਮਹੱਲ ਵੇਖਣ ਦਾ ਸੁਪਨਾ ਅਧੂਰਾ ਹੀ ਰਹਿ ਗਿਆ!
ਕਿਤਾਬ ਦੇ ਕਵਰ ਪੇਜ ਤੇ ਲਿਖਿਆ ਸੀ..”ਤੀਸ ਦਿਨੋਂ ਮੇਂ ਡਾਕਟਰ ਬਨੇ..ਕਿਤਾਬ ਕੀ ਕੀਮਤ ਸਿਰਫ 20 ਰੁਪਏ..ਤੀਨ ਕੇ ਸਾਥ ਏਕ ਫ੍ਰੀ”!
(ਪੰਜ ਸਾਲ ਪਹਿਲੋਂ ਲਿਖੀ)
ਹਰਪ੍ਰੀਤ ਸਿੰਘ ਜਵੰਦਾ