ਉੱਨੀ ਸੌ ਸਤਾਨਵੇਂ ਅਕਤੂਬਰ ਨਵੰਬਰ ਦਾ ਮਹੀਨਾ..ਇੰਗਲੈਂਡ ਦੀ ਮਹਾਰਾਣੀ ਐਲੀਜ਼ਬੇਥ ਇੱਕ ਦਿਨ ਵਾਸਤੇ ਅੰਮ੍ਰਿਤਸਰ ਆਈ..ਅੰਤਾਂ ਦੀਆਂ ਤਿਆਰੀਆਂ..ਸਫਾਈ..ਪੰਥ ਰਤਨ ਨੂੰ ਨਵਾਂ ਨਵਾਂ ਮਿਲਿਆ ਮੁਖ ਮੰਤਰੀ ਦਾ ਤਾਜ..ਐੱਸ ਐੱਸ ਪੀ ਪਰਮਜੀਤ ਸਿੰਘ ਗਿੱਲ,ਸੁਖਪਾਲ ਸਿੰਘ ਗਿੱਲ,ਮਨਜਿੰਦਰ ਸਿੰਘ ਕੰਗ,ਗਵਰਨਰ ਬੀ ਕੇ ਐੱਨ ਛਿੱਬਰ,ਮਨਜੀਤ ਸਿੰਘ ਕਲਕੱਤਾ,ਟੋਹੜਾ,ਸਰਬਜੀਤ ਸਿੰਘ ਡੀ.ਸੀ ਅਤੇ ਉਸਦੇ ਘਰੋਂ, ਅਤੇ ਸਭ ਤੋਂ ਸੱਜੇ ਪਾਸੇ ਜਿਲਾ ਸੰਪਰਕ ਅਫਸਰ ਸ੍ਰ ਗਿਆਂਨ ਸਿੰਘ ਜੀ ਅਜੇ ਵੀ ਮੇਰੇ ਨਾਲ ਜੁੜੇ ਨੇ..ਹੋਰ ਵੀ ਕਿੰਨੇ ਗੋਰੇ ਅਤੇ ਦੇਸੀ ਅਫਸਰ..ਸਾਰੀ ਬ੍ਰਿਟਿਸ਼ ਐਂਬੈਸੀ..ਕਿੰਨਾ ਕੁਝ..!
ਉਸ ਵੇਲੇ ਦਾ ਸਾਰਾ ਪ੍ਰਸ਼ਾਸ਼ਨ..ਅਮਲਾ ਫੈਲਾ..ਮਰਜੀ ਬਗੈਰ ਪੱਤਾ ਵੀ ਨਹੀਂ ਸੀ ਹਿੱਲਦਾ..ਸਿਜਦੇ,ਸਲਾਮਾਂ,ਸੈਲੂਟ ਇੱਜਤ ਮਾਣ ਅਹੁਦੇ ਪਦਵੀਆਂ ਸਟਾਰ ਬੱਤੀ ਵਾਲੀਆਂ ਗੱਡੀਆਂ ਲੁੱਛ ਲੁੱਛ ਕਰਦੀਆਂ ਵਰਦੀਆਂ..!
ਉਸ ਵੇਲੇ ਸਭ ਕੁਝ ਸਦੀਵੀ ਲੱਗਦਾ ਸੀ..ਪਰ ਅੱਜ ਸਭ ਕੁਝ ਬਦਲ ਗਿਆ..ਕੰਪਲੈਕਸ ਦਾ ਨਵਾਂ ਸਰੂਪ..ਨਵਾਂ ਪ੍ਰਸ਼ਾਸ਼ਨ..ਨਵੀਂ ਸਰਕਾਰ..ਨਵੇਂ ਤੌਰ ਤਰੀਕੇ..ਰਿਵਾਜ..!
ਇਹਨਾਂ ਵਿਚੋਂ...
ਕੁਝ ਜਿਉਂਦੇ ਨੇ ਕੁਝ ਚਲੇ ਗਏ..ਨਾ ਮੁੱਕਣ ਵਾਲੇ ਚੁਰਾਸੀ ਦੇ ਗੇੜ ਵਾਲੇ ਸਫ਼ਰ ਤੇ..ਕਈਆਂ ਦਾ ਕੋਈ ਪਤਾ ਨਹੀਂ..ਐਸ ਵੇਲੇ ਕਿਥੇ ਹੈਨ..ਕਿਸ ਹਾਲਤ ਵਿੱਚ ਹਨ..ਹੈ ਵੀ ਨੇ ਕੇ ਨਹੀਂ..!
ਦੋਸਤੋ ਇਥੇ ਕੁਝ ਵੀ ਸਦੀਵੀਂ ਨਹੀਂ..ਸਭ ਨੇ ਇੱਕ ਦਿਨ ਬਦਲ ਕੇ ਮੁੱਕ ਜਾਣਾ..ਸਿਵਾਏ ਰੱਬ ਦੇ ਨਾਮ ਦੇ..ਸਦਾ ਨਾ ਬਾਗੀਂ ਬੁਲਬੁਲ ਬੋਲੇ..ਸਦਾ ਨਾ ਮੌਜ ਬਹਾਰਾਂ..ਸਦਾ ਨਾ ਹੁਸਨ ਜਵਾਨੀ ਮਾਪੇ..ਸਦਾ ਨਾ ਸੋਹਬਤ ਯਾਰਾਂ..!
ਸੋ ਜਮੀਨ ਵੱਲ ਵੇਖਦੇ ਹੋਏ ਤੁਰੇ ਜਾਓ ਕਿਓੰਕੇ ਦੂਰ ਉੱਚੀ ਉੱਡਦੀ ਇੱਲ ਨੂੰ ਵੀ ਦਿਨ ਢਲੇ ਰਾਤ ਕੱਟਣ ਜਮੀਨ ਤੇ ਵਾਪਿਸ ਪਰਤਣਾ ਹੀ ਪੈਂਦਾ..!
ਹਰਪ੍ਰੀਤ ਸਿੰਘ ਜਵੰਦਾ
