ਮਿੰਨੀ ਕਹਾਣੀ
ਪਾਸਵਰਡ
ਉਹ ਤਕਰੀਬਨ ਮੈਨੂੰ ਜਦੋਂ ਮਿਲੀ ਉਸਦੇ ਚਿਹਰੇ ‘ਤੇ ਮੁਸਕਾਨ ਹੁੰਦੀ । ਉਸਦੀ ਇਹ ਮੁਸਕਾਨ ਮੈਨੂੰ ਬਹੁਤ ਪਿਆਰੀ ਲੱਗਦੀ ਪਰ ਅੱਜ ਉਹ ਉਦਾਸ ਸੀ ।ਚਿਹਰਾ ਮੁਰਝਾਇਆ ਹੋਇਆ ।ਉਸਨੂੰ ਇੰਝ ਦੇਖ ਮੈਂ ਬਹੁਤ ਉਤਾਵਲੇਪਣ ਨਾਲ ਪੁੱਛਿਆ ,” ਨੀਤੂ ਕੀ ਹੋਇਆ ਤੈਨੂੰ …..ਏਨੀ ਉਦਾਸੀ !”
ਉਹ ਪਹਿਲਾਂ ਕੁੱਝ ਸਮਾਂ ਚੁੱਪ ਰਹੀ, ਫਿਰ ਅਚਾਨਕ ਅੱਖਾਂ ਵਿੱਚ ਅੱਥਰੂਆਂ ਦਾ ਅਥਾਹ ਵਹਾਅ ਰੋਕਦੀ ਹੋਈ ਬੋਲੀ,” ਰੂਪ ਇੱਕ ਔਰਤ ਦਾ ਚਰਿੱਤਰ ਨਿਰਧਾਰਿਤ ਕਰਨਾ ਕਿੰਨਾ ਸੌਖਾ ਹੁੰਦਾ ਨਾ ਮਰਦਾਂ ਲਈ !”
ਮੈਂ ਹੈਰਾਨ ਹੁੰਦਿਆਂ ਪੁੱਛਿਆ ,” ਨੀਤੂ ਕੀ ਹੋਇਆ ? ਇਹ ਕੀ ਕਹਿ ਰਹੀ ਏਂ ਤੂੰ?”
” ਤੈਨੂੰ ਪਤਾ ਫੋਨ ਦਾ ਇੱਕ ਪਾਸਵਰਡ ਵੀ ਤੇਰੇ ਚਰਿੱਤਰ ਦਾ ਨਿਰਮਾਣ ਕਰ ਸਕਦਾ ” ਉਸਨੇ ਡੂੰਘੀ ਉਦਾਸੀ ਵਿੱਚ ਕਿਹਾ।
ਮਤਲਬ ? ਮੈਂ ਉਸਦੇ ਚਿਹਰੇ ਤੇ ਉਸਦੀਆਂ ਉਦਾਸ ਅੱਖਾਂ ਦੇ ਦਰਦ ਨੂੰ ਦੇਖਦੇ ਹੋਏ ਪੁੱਛਿਆ।
ਉਹ ਭਰੇ ਮਨ ਨਾਲ ਦੱਸਣ ਲੱਗੀ, ” ਰੂਪ ਕੁਝ ਦਿਨ ਪਹਿਲਾਂ ਦੀ ਗੱਲ ਏ ,ਮੈਂ ਆਪਣੇ ਘਰਵਾਲੇ ਦਾ ਫੋਨ ਕਿਸੇ ਜ਼ਰੂਰੀ ਕੰਮ ਲਈ ਫੜਿਆ ।ਉਸਨੂੰ ਪਾਸਵਰਡ ਲੱਗਾ ਹੋਇਆ ਸੀ ਜਿਸਦਾ ਮੈਨੂੰ ਪਤਾ ਨਹੀਂ ਸੀ ।ਮੈਂ ਆਪਣੇ ਘਰਵਾਲੇ ਤੋਂ ਉਸਦਾ ਪਾਸਵਰਡ ਪੁੱਛਿਆ । ਬੱਸ ਪੁੱਛਣ ਦੀ ਦੇਰ ਸੀ, ਉਸਨੇ ਬਹੁਤ ਗੁੱਸੇ ਤੇ ਰੋਹਬ ਨਾਲ ਮੈਨੂੰ ਬੋਲਣਾ ਸ਼ੁਰੂ ਕਰ ਦਿੱਤਾ ,” ਕਿਉਂ ਕੀ ਕੰਮ ਏ ਮੇਰੇ ਫੋਨ ਨਾਲ ਤੇਰਾ ? ਕੀ ਕਰਨਾ ਤੂੰ ਮੇਰਾ ਪਾਸਵਰਡ ਜਾਣ ਕੇ। ਤੂੰ ਬਹੁਤੀ ਜਸੂਸੀ ਨਾ ਕਰਿਆ ਕਰ ਮੇਰੀ ।...
ਮੈਨੂੰ ਪਤਾ ਮੈਂ ਕੀ ਕਰ ਰਿਹਾਂ।ਆਪਣੇ ਕੰਮ ਨਾਲ ਮਤਲਬ ਰੱਖਿਆ ਕਰ । ਤੈਨੂੰ ਸਭ ਕੁਝ ਦੱਸਣਾ ਜ਼ਰੂਰੀ ਨਹੀਂ ।
ਇਹ ਸਭ ਸੁਣ ਮੈਂ ਚੁੱਪ ਵੱਟ ਲਈ ।ਹਿੰਮਤ ਨਹੀਂ ਹੋਈ ਕੁਝ ਪੁੱਛਣ ਦੀ…
..….ਹਾਂ ਪਰ ਪਤਾ ਨਹੀਂ ਕੀ ਮਨ ਵਿੱਚ ਆਇਆ ਕਿ ਮੈਂ ਆਪਣਾ ਫੋਨ ਫੜ ਉਸਦਾ ਵੀ ਪਾਸਵਰਡ ਬਦਲ ਦਿੱਤਾ । ਕਿਉਂਕਿ ਮੇਰੇ ਫੋਨ ਦਾ ਪਾਸਵਰਡ ਤਾਂ ਬੱਚੇ ਤੋਂ ਲੈ ਪਰਿਵਾਰ ਦੇ ਹਰ ਮੈਂਬਰ ਨੂੰ ਪਤਾ ਸੀ।
ਫਿਰ ਅੱਜ ਅਚਾਨਕ ਮੇਰੇ ਘਰਵਾਲ਼ੇ ਨੇ ਮੇਰਾ ਫੋਨ ਫੜ ਲਿਆ ।ਨਵਾਂ ਪਾਸਵਰਡ ਲੱਗਾ ਦੇਖ ਉਸਨੂੰ ਜਿਵੇਂ ਝਟਕਾ ਲੱਗ ਗਿਆ ਹੋਵੇ ।ਉਸਨੇ ਲਗਾਤਾਰ ਬੋਲਣਾ ਸ਼ੁਰੂ ਕਰ ਦਿੱਤਾ,”ਇਸਦਾ ਪਾਸਵਰਡ ਕੀ ਏ ? ਪਾਸਵਰਡ ਤੂੰ ਕਿਉਂ ਬਦਲ ਦਿੱਤਾ….ਅੱਛਾ!! ਕੁਝ ਖਾਸ ਈ ਹੋਣਾ ਜੋ ਲੁਕਾਉਣਾ ਪੈ ਰਿਹੈ ਤੈਨੂੰ…ਅਜਿਹਾ ਕੀ ਪ੍ਰਾਈਵੇਟ ਏ ਤੇਰਾ ਜੋ ਪਾਸਵਰਡ ਬਦਲਣਾ ਪੈ ਗਿਆ ……ਮੈਨੂੰ ਤੇਰੇ ਲੱਛਣ ਸਹੀ ਨਹੀਂ ਲੱਗਦੇ .…..ਵੇਖੀਂ ਕਿਤੇ ਕੋਈ ਕਾਰਾ ਈ ਨਾ ਕਰ ਦੇਵੀਂ ।
ਉਸਨੇ ਲਗਾਤਾਰ ਮੇਰੇ ਉੱਤੇ ਇਲਜ਼ਾਮ ਲਗਾਉਂਦੇ ਹੋਏ ਮੈਨੂੰ ਚਰਿੱਤਰਹੀਣਤਾ ਦਾ ਸਰਟੀਫਿਕੇਟ ਦੇ ਦਿੱਤਾ ।
ਪਰ ਰੂਪ ਹਰ ਗੱਲ ਲਈ ਮੈਂ ਹੀ ਕਸੂਰਵਾਰ ਕਿਉਂ?ਮੇਰਾ ਕੀ ਕਸੂਰ ਸੀ ? ਹੁਣ ਉਸਦੀਆਂ ਅੱਖਾਂ ਵਿਚਲਾ ਡੱਕਿਆ ਦੁੱਖਾਂ ਦਾ ਦਰਿਆ ਵਹਿ ਰਿਹਾ ਸੀ ਤੇ ਨਾਲ ਹੀ ਵਹਿ ਰਿਹਾ ਸੀ ਉਸ ਵੱਲੋਂ ਕੀਤਾ ਸਵਾਲ ,”ਹਰ ਗੱਲ ਲਈ ਮੈਂ ਹੀ ਕਸੂਰਵਾਰ ਕਿਉਂ??
ਰੁਪਿੰਦਰ ਕੌਰ ਸੰਧੂ
ਅੰਮ੍ਰਿਤਸਰ ਸਾਹਿਬ ।
