ਯੂਨਾਨੀਆਂ ਦਾ ਘੋੜਾ
ਬਹੁਤ ਪੁਰਾਣੀ ਗੱਲ ਹੈ,ਈਸਾ ਤੋਂ ਬਾਰਾਂ ਤੇਰਾਂ ਸੌ ਸਾਲ ਪਹਿਲਾਂ ਦੀ ਜਾਂ ਕਹਿ ਲਵੋ ਲਗਭਗ ਚਾਰ ਕੁ ਹਜਾਰ ਸਾਲ ਪਹਿਲਾਂ ਦੀ। ਇੱਕ ਸ਼ਹਿਰ ਸੀ ਟਰਾਏ ਤੁਰਕੀ ਵਿੱਚ। ਉਸ ਸ਼ਹਿਰ ਵਾਲਿਆਂ ਦੀ ਯੂਨਾਨ ਨਾਲ ਬਿਲਕੁਲ ਨਹੀਂ ਸੀ ਬਣਦੀ ਕਿਉਂਕਿ ਟਰਾਏ ਵਾਲਿਆਂ ਦਾ ਛੋਟਾ ਰਾਜਕੁਮਾਰ ਸਪਾਰਟਾ ਸ਼ਹਿਰ ਦੇ ਰਾਜੇ ਦੀ ਰਾਣੀ ਨੂੰ ਭਜਾ ਕੇ ਲੈ ਗਿਆ ਸੀ। ਉਹ ਰਾਣੀ ਦੁਨੀਆਂ ਦੀ ਸਭ ਤੋਂ ਖੂਬਸੂਰਤ ਔਰਤ ਸੀ।
ਯੂਨਾਨੀਆਂ ਨੇ ਟਰਾਏ ਸ਼ਹਿਰ ਤੇ ਹਮਲਾ ਕਰ ਦਿੱਤਾ। ਪਰ ਕਿਉਂਕਿ ਟਰੌਜਿਨ ਲੋਕ ਬਹੁਤ ਬਹਾਦਰ ਸਨ ਅਤੇ ੳਹਨਾਂ ਦੇ ਸ਼ਹਿਰ ਦੁਆਲੇ ਬਹੁਤ ਉੱਚੀ ਤੇ ਯੋਜਨਾਬੱਧ ਕੰਧ ਸੀ ,ਇਸ ਲਈ ਇਸ ਸ਼ਹਿਰ ਨੂੰ ਜਿੱਤਣਾ ਬਹੁਤ ਮੁਸ਼ਕਿਲ ਕੰਮ ਸੀ।
ਦੋਹਾਂ ਵਿਚਕਾਰ ਯੁੱਧ ਦਸ ਸਾਲ ਤੱਕ ਚੱਲਿਆ, ਪਰ ਕਿਸੇ ਸਿੱਟੇ ਤੇ ਨਹੀਂ ਪਹੁੰਚਿਆ। ਫਿਰ ਅਚਾਨਕ ਯੂਨਾਨੀ ਫੌਜ ਵਾਪਸ ਜਾਣ ਲੱਗ ਪਈ। ਪਰ ਉਹ ਆਪਣੇ ਨਾਲ ਲਿਆਂਦਾ ਬਹੁਤ ਵੱਡਾ ਲੱਕੜ ਦਾ ਘੋੜਾ ਸਮੁੰਦਰ ਕਿਨਾਰੇ ਸ਼ਹਿਰ ਦੇ ਬਾਹਰ ਛੱਡ ਗਏ।
ਸਵੇਰ ਸਮੇਂ ਜਦੋਂ ਟਰੌਜਿਨਜ਼ ਨੇ ਦੇਖਿਆ ਕਿ ਯੂਨਾਨੀ ਫੌਜ ਵਾਪਸ ਚਲੀ ਗਈ ਹੈ ਤੇ ਇਕ ਘੋੜਾ ਤੋਹਫੇ...
ਵਜੋਂ ਛੱਡ ਗਈ ਹੈ ਤਾਂ ਉਹ ਬਹੁਤ ਖੁਸ਼ ਹੋਏ। ਉਹ ਘੋੜੇ ਨੂੰ ਖਿੱਚ ਕੇ ਅੰਦਰ ਲੈ ਜਾਣ ਲੱਗੇ ਤਾਂ ਕੁਝ ਸਿਆਣੇ ਲੋਕਾਂ ਨੇ ਕਿਹਾ ਕਿ ਇਹ ਯੂਨਾਨੀਆਂ ਦੀ ਕੋਈ ਚਾਲ ਹੋ ਸਕਦੀ ਹੈ ਪਰ ਖੁਸ਼ ਹੋਏ ਬਹੁਤੇ ਲੋਕਾਂ ਨੇ ਉਹਨਾਂ ਦੀ ਗੱਲ ਨਾ ਮੰਨੀ।
ਉਹ ਘੋੜੇ ਨੂੰ ਖਿੱਚ ਕੇ ਸ਼ਹਿਰ ਅੰਦਰ ਲੈ ਆਏ ਤੇ ਜਸ਼ਨ ਮਨਾ ਕੇ ਬੇਫਿਕਰ ਹੋ ਕੇ ਸੌਂ ਗਏ। ਟਿਕੀ ਰਾਤ ਨੂੰ ਯੂਨਾਨੀ ਘੋੜੇ ਵਿਚੋਂ ਬਾਹਰ ਆਏ।ਸਭ ਤੋਂ ਪਹਿਲਾਂ ਪਹਿਰੇਦਾਰਾਂ ਨੂੰ ਮਾਰ ਕੇ ਸ਼ਹਿਰ ਦੇ ਦਰਵਾਜ਼ੇ ਖੋਲੇ ਤੇ ਆਪਣੀ ਸਾਥੀ ਫੌਜ ਜੋ ਕਿ ਪਹਿਲਾਂ ਹੀ ਸਮੁੰਦਰ ਕਿਨਾਰੇ ਆ ਗਈ ਸੀ ਨੂੰ ਅੰਦਰ ਬੁਲਾ ਲਿਆ ਤੇ ਟਰਾਏ ਸ਼ਹਿਰ ਜਿੱਤ ਲਿਆ।
ਇਸ ਲਈ ਜੇਕਰ ਮੋਦੀ ਸਰਕਾਰ ਨੇ ਖੇਤੀ ਕਾਨੂੰਨ ਵਾਪਸ ਕਰਨ ਦਾ ਐਲਾਨ ਕਰ ਦਿੱਤਾ ਹੈ ਤਾਂ ਬਹੁਤੇ ਖੁਸ਼ ਹੋਣ ਦੀ ਉਨਾਂ ਚਿਰ ਲੋੜ ਨਹੀਂ ਜਿੰਨਾਂ ਚਿਰ ਲਿਖਤੀ ਰੂਪ ਵਿੱਚ ਸਰਕਾਰ ਕਾਨੂੰਨ ਰੱਦ ਨਹੀਂ ਕਰਦੀ।
ਧਿਆਨ ਰੱਖੋ ਇਹ ਐਲਾਨ ਕਿਤੇ ਯੂਨਾਨੀਆਂ ਦਾ ਘੋੜਾ ਨਾ ਹੋਵੇ?
ਕਿਰਨ ਪੂਨੀਆ ਬਰਾੜ